АСТАНА, 16 мамыр — Sputnik. Ақмола облысында жеңіл көлік пен жүк көлігі соқтығысып, салдарынан үш адам қаза тапты, деп хабарлады Ішкі істер департаменті Sputnik Қазақстан агенттігіне.
Жол апаты 15 мамыр күні Жақсы ауданында Алматы-Екатеринбург республикалық тас жолының 930-шы километрінде болған.
"Болжам бойынша, Audi-100 автокөлігінің жүргізушісі, Жақсы ауылының 40 жастағы тұрғыны, Қостанайға қарай кетіп бара жатып, қарсы беттік қозғалыс жолағына өтіп кеткен. Сол жерде Renault Magnum көлігіне соғылады. Жол апаты салдарынан жүргізуші мен екі жолаушы алған жарақатынан оқиға орнында қаза тапты", — деп хабарлады ІІД баспасөз қызметінің басшысы Гүлнәр Пинчук.
Оқиға орнына келген жергілікті полиция қызметінің айтуынша, жол құрғақ әрі айқын болған. Жол апаты дерегі бойынша, ҚР ҚК 345-бабына сәйкес сот алды тергеу ісі басталды.
Бұдан бұрын Audi жүргізушісі әкімшілік жауапқа тартылған. Жүк көлігіңнің жүргізушісі, Саран тұрғыны, зардап шеккен жоқ.