АСТАНА, 29 сәуір — Sputnik. Алматыда қатты құйып жауған жаңбырдан кейін су басу салдарын жоюға 540 адам қатысты, деп хабарлады қалалық төтенше жағдайлар жөніндегі департаменттің баспасөз қызметі.
"Наурызбай ауданы Қалқаман шағын ауданындағы аулалар мен көшелерді тазарту үшін өзара әрекет ету жоспарына байланысты ҚР ІІМ Ұлттық Ұланының азаматтық қорғаныс полкінен 110 сарбаз және ҚР ҰҚК шекара қызметінің 2027 әскери бөлімшесі жеке құрамынан 56 сарбаз жұмылдырылды", — деп көрсетілген хабарламада.
Алматы қаласы төтенше жағдайлар жөніндегі департаментінің қызметкерлері, құтқару қызметі және қала аудандарының әкімдіктері көшелер мен жолдарды, үйлер мен жертөлелерді, аулаларды тазарту және барлық аудандарда қайта су басу қаупін жою жұмыстарын жалғастыруда.
27-29 сәуір аралығында 23 жеке үйді, 48 аула мен он көшені су басқан. Су басу салдарын жоюға 540 адам мен 68 техника қатысқан.
