Оңтүстік Қазақстанда екі адам 7 кг героинмен ұсталды

АСТАНА, 18 сәуір — Sputnik. Оңтүстік Қазақстан облысында полицейлер аса ірі көлемде есірткі өткізді деген күдікпен екі ер адамды ұстады деп хабарлайды Оңтүстік Қазақстан облысы ішкі істер департаментінің баспасөз қызметі.

Шымкент-Ташкент тас жолында жедел іздеу шараларын жүргізу барысында, есірткіге қарсы күрес басқармасының қызметкерлері Қазғұрт ауданының 1969 және 1970 жылы туған екі тұрғынын есірткі өткізу үстінде ұстады.

Ұсталғандардың көлігін тінту кезінде полицейлер героинге ұқсас есірткі салынған жеті пластмасса құтыны тапқан. Сот-қылмыстық сараптамаға сүйенсек, табылған құтылардың ішінде "героин" есірткісі болып шықты, жалпы салмағы 7,5 килограмға жуық.

Күдіктілер қамауға алынып, сот алды тергеу ісі жүргізілуде.