АСТАНА, 31 наурыз — Sputnik. Ақмола облысында тас жолда он бір автокөліктің соқтығысу дерегі бойынша қылмыстық іс қозғалды деп хабарлады өңірдің ішкі істер департаменті баспасөз қызметінің басшысы Гүлнар Пинчук Sputnik Қазақстан агенттігіне.
Бұдан бұрын хабарланғандай, 30 наурыз күні сағат 17:00-де Аршалы ауданы аумағындағы Алматы-Екатеринбург жолында ірі жол апаты болған. Боранның салдарынан жол дұрыс көрінбей, Hyundai, Volkswagen, Mercedes және "КамАЗ" көліктері соқтығысыпты.
Барлығы 11 автокөлік соқтығысқан. Алты адам әр түрлі жарақат алып, Астана ауруханаларына жеткізілді.
Аталған дерек бойынша, ҚР ҚК 345-бабы 1-бөлігіне сәйкес қылмыстық іс қозғалды. Бірқатар сараптама тағайындалды.
