АСТАНА, 10 наурыз – Sputnik, Айымгүл Әбіл. Келесі жылдан бастап әйелдердің зейнет жасы біртіндеп көтеріле бастайды. Осыған бірінші болып іліккендер, яғни, 2018 жылдың бірінші шілдесінен 58,5 жасында зейнетке шығатын әйелдер зейнетақы көлемінен ұтатын болады, деп хабарлады ҚР Еңбек және халықты әлеуметтiк қорғау министрi Тамара Дүйсенова.
"2014 жылы зейнетақы жүйесін одан әрі жаңғырту жөнінде концепция, заң да қабылданды. 2018 жылдың бірінші қаңтарынан бастап зейнетақы жасын кезең-кезеңімен арттыру басталады. Зейнет жасын 63 жасқа дейін жеткізуді он жыл ішінде жүргіземіз. Ол 2018 жылдан 2028 жылға дейін жарты жылдан көтеріліп отырады. Яғни біздің әйел азаматтарымыз 2028 жылы ғана 63 жасқа келіп зейнетке шығатын болады", — деді үкіметте өткен баспасөз мәслихатында Дүйсенова.
Осылайша, келесі жылы бірінші қаңтарда зейнетке шығуы тиіс әйелдер жарты жылдан кейін, яғни бірінші шілдеден бастап шығады. Министрдің айтуынша, осы уақытта зейнетке шығатын әйелдер қайта ұтады екен.
"Бірінші шілдеде біз базалық зейнетақының деңгейін көтереміз. Сондықтан бірінші ілінген әйелдердің базалық зейнетақысы екі есеге көбейеді. Сондықтан әйелдер зейнетақы көлемінен қайта ұтатын болады", — дейді министр.
Дүйсенова атап өткендей, бүгінде еліміздегі зейнетақы жүйесінің үш қаржыландыру көзі бар. Ал әлемдік тәжірибе көрсетіп отырғандай, көпдеңгейлі жүйе тұрақты және жақсы зейнетақы алуға мүмкіндік береді.
"Мемлекет базалық зейнетақыны 2005 жылдан бастап ендіріп, төлеп келеді. Екіншіден, азаматтар өздері де зейнетақы жүйесіне қатысуы керек. 1998 жылдан бастап барлық жұмыс істейтін азаматтар өз жалақысының он пайызын жинақтаушы зейнетақы қорына аударады. Үшіншіден, жұмыс беруші 2020 жылдан бастап зейнетақы жүйесіне қосылып, өз қаражаты есебінен бес пайыз төлейтін болады", — деді Дүйсенова.
