АСТАНА, 20 ақп — Sputnik. Лисаковскіде кәмелеттік жасқа толмағандарды "Церковь Жатвы" діни ағымына тартқан ер адамға 400 мың теңге айыппұл салынды деп хабарлайды Қостанай облыстық сотының баспасөз қызметі.
Ер адам ҚР ӘҚБК 490 бабы (Қазақстан Республикасының діни қызмет және діни бірлестіктер туралы заңнамасын бұзу) бойынша жауапқа тартылды.
Ер адам кәмелеттік жасқа толмаған О. мен В. есімді балаларды ата-аналарының рұқсатынсыз "Церковь Жатва" ұйымына қабылдап, діни іс-шараларға қатыстырғаны үшін айыпты деп танылды. Бұл оқиға 3 баптың 16 пунктінде қарастырылған заңды бұзу болып саналады, бұл бапқа сәйкес діни бірлестіктің басшысы ата-анасының рұқсатынсыз кәмелеттік жасқа толмағандарды діни бірлестіктің қызметіне қатыстырмауы тиіс", — делінген сот хабарламасында.
Сот отырысында ер адам айыбын мойындаған жоқ. Сот оның қызметін тоқтатумен қатар, 400 мың теңге айыппұл салды. Сот үкімі заңды күшіне әлі енген жоқ.
