АСТАНА, 6 ақп — Sputnik. Алғашқы қазақстандық астық Қытайдың Ляньюньган порты арқылы Вьетнамның Хошимин портына жіберілді деп хабарлайды "ҚТЖ" ҰК" АҚ баспасөз қызметі.
Қазақстанның Жалтыр станциясынан тұңғыш рет 32 контейнермен 700 тонна қазақстандық астық Ляньюньган порты арқылы Хошимин портына жөнелтілді.
"ҚТЖ" ҰК" АҚ еншілес кәсіпорны "KTZ Express" АҚ Ляньюньган қаласындағы "Қытай-Қазақстан халықаралық логистикалық компаниясы" ЖШС-мен бірлесіп, қанатқақты жоба ретінде осы бағдарды таңдады.
Ляньюньган портында қазақстандық астықты жіберуге қатысты салтанатты шара өткізілді. Оған "Ляньюньган" порты МК" ЖШС директорлар кеңесінің төрағасы Дин Жуй қатысып, қытай тарапының Қазақстан аумағы арқылы көлік дәлізін дамытуға, қазақстандық өнімдерді Қытай аумағы арқылы Оңтүстік –Шығыс Азия елдеріне шығаруға қолдау көрсететіндігін атап өтті. Осы дәліз арқылы Қазақстанға Оңтүстік Шығыс Азия елдерінің түрлі өнімдерін жеткізу де жоспарланып отыр.
"Қазақстандық өнімді Ляньюньган портының әлеуетін пайдалана отырып жүзеге асыру Жібек жолы экономикалық белдеуін дамытуды көздейді", — делінген хабарламада.
Ляньюньган теңіз порты Қытайдағы теміржол бағдарымен тікелей байланысқан әлемдегі ірі порттардың бірінен саналады.
Ляньюньган теңіз портындағы көлік-логистикалық терминалы "ҚТЖ" ҰК" АҚ еншілес кәсіпорны — "KTZ Express" АҚ мультимодальдық компаниясымен "Ляньюньган порты халықаралық логистикалық компаниясы" ЖШС бірлескен кәсіпорны болып табылады.
