АСТАНА, 14 қаң — Sputnik. "Барыс" хоккей клубы Астана уақытымен жұмадан сенбіге қараған түні Братиславада жергілікті "Слован" командасынан 1:4 есебімен ұтылды.
Өткен жылдың соңында қазақстандық команданың сәтсіз ойындарынан соң бапкері Эдуард Занковец бір заңдылықты баса көрсеткен болатын: "Барыс" ойынның екінші кезеңінде ұтылады.
Братиславада өткен матч та соның бір дәлелі болды. Бірінші периодта теңбе-тең ойын көрсеткенімен, екінші жиырмаминуттықта "Барыс" 0:3 есебімен ұтылды – айдын иелері арасынан Джеф Тэйфф, Патрик Лушняк және Ник Пластино ерекше көзге түсті.
Үшінші периодта "Барыс" қарсыластың қақпасына шабуылды үдеткенімен, бір-ақ рет өз дегеніне қол жеткізді: Брэндон Боченски гол соқты. Алайда ойынның бітуіне алты минут қалғанда, "Слован" "Барыс" қақпасына тағы бір шайба түсірді.
Бұл жеңілістен соң қазақстандық клуб 71 ұпаймен турнирлік кестеде алтыншы орында тұр. Келесі ойынды 16 қаңтар күні өз алаңында Уфадан келген командаға қарсы өткізеді.
