АСТАНА, 22 жел – Sputnik. Ұялы телефон жарылысынан зардап шеккен Ақтөбе тұрғыны жиырма сегіз жасар Ардақ Орынбасарова оқиғаның мән-жайын әңгімелеп берді деп жазады "Диапазон" газеті.
Қыздың мәліметінше, зарядталып тұрған iPhone 5S 18 желтоқсан күні түнгі үш кезінде өртеніп кеткен. Ардақ кенеттен ұйқысынан оянып, төсегінің жанып жатқанын көріпті. Көмекке шақырғысы келген қыз түтін жұтып қойғандықтан, айғайлап дауыстай алмаған екен. Көмекке жүгіріп келген әкесі тарс жабылып қалған есікті әрең ашыпты. Әйтеуір, күйік шалған қызды бөлмеден құтқарып, ауруханаға алып барған. Қыз жан сақтау бөлімінде бір тәулік бойы жатқан екен. Ардақтың бүкіл денесі, бет ауызы күйіп қалған.
Өрт кезінде қыздың бөлмесі, ноутбук және құндыз тоны жанып кеткен. Бұдан бөлек, Ардаққа пластикалық операция қажет болуы мүмкін. Қыз 2015 жылы iPhone сатып алған дүкенге шағым түсірмекші.
Ардақ фитнес орталықта жұмыс істеп, қайырымдылықпен айналысады.
