АСТАНА, 4 жел — Sputnik. Алматыда жексенбі күні таңертең "Байсат" базарында өрт шықты, зардап шеккендер жоқ деп хабарлады қалалық ТЖД ресми өкілі Сандуғаш Баймұхамбетова.
Оның мәліметінше, өрт шыққаны туралы хабарлама "101" нөміріне 05:57-де түскен.
"Оқиға орнына күш пен құралдар жіберілді. Алғашқы өрт сөндірушілер бес минут ішінде жетті – 6:03-те. Өрт сөндіруші құтқарушылар келген кезде жағдай былай болатын: контейнерлер лапылдап жанып жатқан. Өрттің күрделілігі үшінші дәрежелі деп бағаланды", — деді Баймұхамбетова.
Оның сөзіне сүйенсек, өрт 06:57-де ауыздықталып, 07:19-да толықтай өшірілді.
Өрттің жалпы аумағы 280 шаршы метрді құрады, зардап шеккендер жоқ.
