АСТАНА, 17 қар — Sputnik. ЭКСПО-2017 аумағында конструкцияның құлауы көрме имиджіне еш әсер етпейді деп мәлімдеді сыртқы істер министрі Ерлан Ыдырысов.
Оқиға сәрсенбі күні 16 қарашада сағат 13.10-де болған. "Астана ЭКСПО-2017" АҚ баспасөз қызметі сәндік конструкция құлаған кезде жұмысшылардың ешқайсы зардап шеккен жоқ деп сендірді.
"Кеше ЭКСПО-да айқын түрде айтылды емес пе, ешқандай мәселе туындаған жоқ. Шатыр құлап кеткен екен, бұл негізгі нысандарға еш ықпалы жоқ аралық конструкция болатын. Мұндай жағдай кез келген құрылыста болады", — деді Ыдырысов тілшілерге.
"Көрме имиджіне ешқандай нұсқан келмейді, өздеріңіз зорайтып көрсетпесеңіздер, ештеңеге әсер етпейді. Бұл тақырыпты дабырайта бермеңіздер, бәрі жоспарға сәйкес жүріп жатыр", — деді ол.
Сенатор Асхат Күзеков өз кезегінде ЭКСПО-2017 құрылысының "тиісті деңгейде" жүріп жатқандығын айтты.
