АСТАНА, 12 қар – Sputnik. Футболдан Қазақстан ұлттық құрамасы жұма күні әлем чемпионаты-2018 іріктеу кезеңінің қарсыластар алаңында өткен матчында Дания құрамасынан 1:4 есебімен ойсырай ұтылды. Сөйтіп, іріктеу кезеңінің Е тобында соңғы орынға түсіп қалды.
Данияға қарсы матч алдында қазақстандық команданың бас бапкері Талғат Байсуфинов командасының дайындығы жақсы екенін, қарсыласты жақсы меңгергендігін мәлімдеп, қапталдарда үздік ойын көрсетсе, жақсы нәтижеге қол жеткізуге болады деп сендірген еді. Бірақ матчтың 15-минутында қарсыластардың шабуылшысы Андреас Корнелиус қапталдан әуелете асырылған допты қазақстандық голкипер Стас Покатиловтың қақпасына баспен соқты.
Бірнеше минуттардан соң қазақстандықтар есепті теңестірді – қорғаушы Ғафуржан Сүйімбаев алыстан жасаған соққысын даттықтар қақпашысы Фредерик Реннов қайтара алмады. Содан кейін алаң иелері шабуылды үдетті, ақыры соңында 36-минутта қазақстандық қорғаушылар өз айып алаңында ойын ережесін бұзуға мәжбүр болды. Тағайындалған пенальти соққысын Кристиан Эриксен орындап, командасына тағы да бір гол әкелді. Екінші таймда қонақтар қақпасына Петер Аркенсон мен Кристиан Эриксен бір-бір голдан соқты.
Осы матчтан кейін Қазақстан құрамасы өз алаңында ұтқан екі ұпайымен іріктеу тобында соңғы орынға түсіп қалды, ал жұмаға дейін бірде-бір ұпай иеленбеген Армения құрамасы Черногория командасын 3:2 есебімен ұтып төртінші орынға көтерілді. Қазақстан құрамасы іріктеу кезеңінің келесі турында Армения командасымен ойнайды – матч келесі жылы 26 наурызда өтеді.
Е тобында бірінші орынға қарсыластар алаңында Румыния командасын 3:0 есебімен ойсырата ұтқан Польша құрамасы шықты. Екінші орында жеті ұпаймен Черногория тұр, үшінші орында алты ұпаймен Дания құрамасы келе жатыр, ал төртінші орынды румындықтар иеленді – олардың қоржынында 5 ұпай бар.
