АСТАНА, 9 қар — Sputnik. Бірнеше апта бұрын ғаламторда жарияланған Lost in Kazakhstan атты бейнежазба америкалық рейтинг бойынша ең үздік "трэвл видео" ондығына енді. Қазақстанның мәдениеті мен табиғаты туралы тамаша ролик туралы жазылған мақала 10best от USA TODAY жобасының сайтында жарияланды.
"Он жыл бұрын Борат Қазақстанды бәрімізге танытты. Бірақ ол мұны дұрыс істеген жоқ. Егер орта азия мемлекеті туралы бар білетініңіз сол бір ойдан шығарылған кейіпкердің айтқаны ғана болса, мына бейнежазбаны тамашалаңыз, себебі Қазақстан таңғажайып ел екен (Борат мұны бізге айтпапты)", — деп жазылған мақалада.
Бейнежазбаның бейне операторы Тимур Тугаловтың айтуынша, Қазақстан туралы видео танымал американ журналы Outside сайтында және Испанияның El Pais газетінде жарияланады екен.
