АСТАНА, 9 қар — Sputnik. Қазақстан парламенті мәжілісінің депутаттары алдағы үш жылға арналған республикалық бюджет жобасын қолдады деп хабарлайды Sputnik Қазақстан агенттігі тілшісі.
Қазақстанның қаржы министрі Бақыт Сұлтановтың мәліметінше, республикалық бюджет шығынының жалпы көлемі бойынша ең қомақты үлес әлеуметтік салаға тиесілі – 2017 жылы 41,7% болса, 2019 жылы 49% дейін жетеді.
"Ақшалай көрсеткішпен беретін болсақ, әлеуметтік саладағы шығындар 11 триллион 667 миллиард теңгені құрайды, оның ішінде 2017 жылы – 3 триллион 570 миллиард теңге", — деді Сұлтанов сәрсенбі күні мәжілістің пленарлық отырысында.
Білім беру салаларын қаржыландыру 2017-2019 жылдары 972 миллиард теңгені құрайды, ал денсаулық сақтау жүйесін қаржыландыру денсаулық сақтау және әлеуметтік даму министрлігі шығындарының аясында 3,1 триллион теңгеге жетеді деп қарастырылып отыр.
