АСТАНА, 8 қар — Sputnik. Алдын ала болжам бойынша, дауылдан келген шығын 470 миллион теңгені құрайды деп хабарлады аймақтың әкімі Кәрім Көкірекбаев.
"Бастапқы болжам бойынша шығын – 470 миллион теңге… Құрылған комиссия келген шығынды есептеп, сметасын дайындап жатыр", — деді Көкірекбаев үкімет отырысында.
Табиғи апаттан әсіресе Тараз қаласының нысандары, сонымен бірге облыстың бес ауданының елді мекендері зардап шеккен. "Барлығы 1754 нысан зардап шегіп, оның ішінде 454 нысанның шатыры 70%-ға бұзылған", — деді әкім.
Оның мәліметінше, 53 мың абонент электр энергиясынсыз қалған.
Дауыл соққан күні 3 қарашада газбен қамтамасыз ету толықтай қалпына келтіріліп, 6 қарашада елді мекендерге электр жарығы берілді. "Бүгін Таразда жеке сектордың 351 абонентінің электр желілері жөнделіп жатыр", — деп атап өтті әкім.
Оның айтуынша, 36 азаматқа медициналық көмек қажет болып, төртеуі ауруханаға жатқызылған.
