АСТАНА, 20 қараша — Sputnik. Енді тәжіктер ел президенті Эмомали Рахмонның шығармаларын радиодан тыңдайды. Тәжікстан билігі мемлекеттік және жекеменшік радиокомпанияларды осыған міндеттеді, деп хабарлайды lenta.ru.
Тәжікстанның телевизия және радиохабар тарату комитеті «бұл әр азаматтың сана-сезімі мен отансүйгіштік сезімін көтереді» деген пікірде.
Дереккөздің хабарлауынша, егер радиокомпания мемлекет басшысының туындыларын радиодан таратудан бас тартса, онда ол лицензиядан айырылады.
«Озоди радиосының» ақпаратынша, Эмомали Рахмон 20-дан аса кітап жазған. 2016 жылдың қарашасында Гиссаре қаласында «Тәжіктер – тарих айнасында» кітабына салмағы бір тонна ескерткіш орнатылды. Кітап 2002 жылы жарық көрген, орыс, ағылшын, неміс, араб, қытай, парсы және француз тілдерінде басылып шықты.
