НҰР-СҰЛТАН, 4 маусым - Sputnik. Алматы облысындағы Алматы-Қорғас тас жолында көлік өртеніп кетті. Өртте екі әйел қаза тапты, деп хабарлайды Sputnik Қазақстан тілшісі.
Әлеуметтік желіде жалынға оранған шетелдік көліктің видеосы пайда болды. Автор көлікте екі әйел болғанын айтады. Олар салоннан шығып үлгермей, тірідей жанып кетті.
"Көлік толығымен өртенді. Оның ішінен екі әйел шыға алмай, жанып кетті. Ешқандай көмек көрсетілмеді", - дейді видео авторы.
Алматы облысы төтенше жағдайлар департаментінің баспасөз қызметі автокөліктің 3 маусымда Еңбекшіқазақ ауданындағы Алматы-Қорғас тас жолының 82-ші шақырымында өртенгенін растады.
"Ақпарат сағат 17.59-да келіп түсті. Оқиға орнына төрт қызметкер мен бір техника аттанды. Ең жақын өрт сөндіру бекетінен қашықтық 45 шақырымды құрады. Көліктен екі жолаушының өртеніп кеткен денесі табылды. Өрттің себебі анықталып жатыр", - деп хабарлады ведомстводағылар.
Оқи отырыңыз: Шығыс Қазақстан облысында өртенген жүк көлігінен екі адамның мәйіті табылды
Сондай-ақ, төтенше жағдайлар департаменті өрттің шығу себебін анықтау үшін оқиға орнына өрт-сынақ зертханасы шақырылғанын атап өтті. Оқиғаның мән-жайын тиісті органдар тексеріп жатыр.
