АСТАНА, 28 ақпан – Sputnik. Боливиядағы тас жолда болған ұшақ апатынан кем дегенде 15 адам қаза тауып, бірнешеуі жарақат алды, деп хабарлайды РИА Новости Unitel телеарнасына сілтеме жасап.
"Өрт сөндірушілер 15 адамның қаза тапқанын хабарлады", - делінген хабарламада.
Бір аурухана он адамның жарақат алғанын хабарлады. Зардап шеккендердің барлығы ұшақ соқтығысқан көліктерде болған.
Боливия әскери-әуе күштерінің C-130 Hercules ұшағы жұма күні апатқа ұшырады. Ұшақ Эль-Альто қаласындағы жолға құлап, бірнеше көлікке соғылғаны туралы хабарланған болатын.
Боливияның Бас азаматтық авиация басқармасының (DGAC) директоры Хосе Антонио Фанола кейінірек ұшақ апатқа ұшырамағанын, керісінше қону кезінде ұшу-қону жолағынан шығып кеткенін мәлімдеді.
Алдын ала ақпарат бойынша, ұшақ Боливияның Орталық банкіне арналған жаңа банкноттарды жеткізіп жатқан.