АСТАНА, 27 қаңтар – Sputnik. Түркиялық инвестициялық-өнеркәсіптік Iskefe Holding тобы тағамдық желатин мен коллаген өндіруге арналған өндірістік кешеннің құрылысын бастады, деп хабарлайды Ауыл шаруашылығы министрлігі.
Жоба Алматы қаласында Iskefe Holding құрамына кіретін Halavet KZ еншілес компаниясы арқылы қолға алынып отыр.
"Инвестицияның жалпы көлемі 60 млн АҚШ долларын құрайды, бұл шетелдік инвесторлар тарапынан Қазақстанның өнеркәсіптік әлеуетіне деген қызығушылықтың жоғары екенін көрсетеді", - деп жазылған хабарламада.
Жаңа зауытта заманауи технологияларды қолданумен қатар, халықаралық сапа стандарттары мен экологиялық қауіпсіздік талаптарын қатаң сақтай отырып, тағам, фармацевтика және косметика салаларына арналған өнімдер өндіру жолға қойылады.
Ол Қазақстанның ішкі нарығын қамтамасыз етуге және экспортқа бағытталады.
Инвестициялық жоба мал шаруашылығы өнімдерін қайта өңдеу саласындағы тапшылықты жоюға, ішкі қосылған құнды арттыруға, сондай-ақ тікелей шетелдік инвестицияларды тартуға бағытталған.
Жобаның іске асырылуы өнеркәсіп секторын орнықты дамытуға және Қазақстанның экспорттық әлеуетін нығайтуға елеулі үлес қосады деп болжанып отыр.