АСТАНА, 26 қаңтар – Sputnik. Ресейдің Сыртқы барлау қызметінің директоры Сергей Нарышкин РИА Новости агенттігіне берген сұхбатында Батыстың әскери-саяси топтары Украинаның батысындағы әскери нысанға ресейлік "Орешник" кешенімен жасалған соққыдан абдырап қалғанын айтты.
"Украинаның батыс аймағындағы әскери нысандардың біріне бірнеше күн бұрын "Орешник" кешенімен жасалған соққыға келсек, бұл Батыстың әскерилерін де, саяси орталарын да абдыратып тастады", — деді Нарышкин.
9 қаңтарда Ресей Қорғаныс министрлігі ел әскері Украинадағы маңызды инфрақұрылым нысандарына жаппай соққы жасау үшін "Орешник" гипердыбысты зымырандарын қолданғанын хабарлады. Бұл соққы Владимир Путиннің резиденциясына жасалған шабуылға жауап ретінде жасалғаны айтылды.
2024 жылғы қарашада "Орешник" алғаш рет ядролық емес гипердыбысты жабдықта жауынгерлік жағдайда сынақтан өткен. Ресей президенті Владимир Путиннің айтуынша, бұл сынақтар НАТО елдерінің Ресейге қатысты агрессивті әрекеттеріне, Украина Қарулы күштерінің америкалық және британиялық алыс қашықтықтағы қаруларды қолдануына жауап ретінде жүргізілген.
Сонымен қатар, Нарышкиннің айтуынша, Путиннің ядролық энергетикалық қондырғысы бар "Буревестник" қанатты зымыраны мен "Посейдон" суасты пилотсыз аппаратының сынақтары сәтті аяқталғаны туралы мәлімдемесі де шетелді таңғалдырған.
"Ресей Федерациясы президентінің "Буревестник" және "Посейдон" қару жүйелерінің сынақтары сәтті аяқталғаны туралы мәлімдемесі, әрине, қарсыластарымызға да, серіктестерімізге де айтарлықтай әсер етті. Батыстағы саясаткерлер, әскери мамандар мен сарапшылардың көпшілігі Ресейдің мұндай жетілдірілген қару жүйелерін салыстырмалы түрде қысқа мерзімде жасап шығара алатынын білмеді", — деді Нарышкин.
2025 жылдың қазан айының соңында Путин "Буревестник" пен "Посейдонның" сынақтары сәтті аяқталғанын мәлімдеген болатын.