АСТАНА, 24 қаңтар – Sputnik. Украина мәселесіне арналған Ресей мен АҚШ саммиті Будапеште ерте ме, кеш пе өтеді. Бұл мәселе күн тәртібінен алынған жоқ. Бұл туралы Венгрия премьер-министрі Виктор Орбан мәлімдеді.
"Біз осы бағытта жұмыс істеп жатырмыз. Ерте ме, кеш пе Будапеште бейбітшілік саммиті өтеді. Қашан және оған кімдер қатысатыны әзірге белгісіз. Алайда бұл мәселе күн тәртібінен алынған жоқ – ол АҚШ жоспарында да, біздің жұмыс дәптерімізде де бар. Саммит екі немесе үш тараптың қатысуымен өтуі мүмкін, бірақ әзірге нақты айта алмаймыз", – деді Орбан Брюссельде өткен ЕО-ның кезектен тыс саммитінен кейін журналистерге.
Айта кетері, Ресей президенті Владимир Путин мен АҚШ президенті Дональд Трамп былтыр 16 қазанда телефон арқылы сөйлесті. Екі жарым сағатқа созылған әңгімеден кейін РФ президентінің көмекшісі Юрий Ушаков Мәскеу мен Вашингтон мемлекет басшыларының жаңа кездесуін дайындауға дереу кірісетінін, оның Будапештте өтуі мүмкін екенін хабарлаған.
Кейінірек Дональд Трамп Будапеште жоспарланған кездесуді кейінге қалдырғанын мәлімдеді. Ал Владимир Путин әңгіме кездесудің толық күшін жою жайлы емес, тек кейінге шегеру туралы болып отырғанын айтты.
РФ президентінің баспасөз хатшысы Дмитрий Песковтың мәліметінше, Венгрияда саммит өткізу әзірге пайдасыз деген пікірді алғаш болып Трамп айтқан, ал Путин бұл көзқараспен келісетінін білдірген.