АЛМАТЫ, 14 желтоқсан - Sputnik. Атырауда электр желілерін қалпына келтіру үшін 40 мамандандырылған бригада жұмыс істеп жатыр, деп хабарлайды облыстық әкімдік.
14 желтоқсанда ауа райының күрт нашарлауына байланысты Атырау облысының аумағында уақытша электр қуаты үзілді. Қазіргі уақытта апаттардың 85 пайызы толығымен жойылды. Бұл туралы "Атырау Жарық" ЖШС басшысы Мейірбек Губашев мәлімдеді.
"Апатты жағдайларды жою мақсатында облыс бойынша күшейтілген режимде 40 мамандандырылған бригада жұмыс істейді. Жеке тұрғын үйлерге тартылған магистральдық электр желілері мен желілерін қалпына келтіру жұмыстары қатар жүргізілуде. Электрмен жабдықтауды толық қалпына келтіру кешкі уақытта жоспарлануда", - деп атап өтті Мейірбек Губашев.
Қазіргі уақытта "Атырау Жарық" кәсіпорны күшейтілген режимде жұмысын жалғастыруда. Электрмен жабдықтау мәселелері бойынша өтініштер мен хабарламалар 109 бірыңғай байланыс орталығы арқылы қабылданады.
Еске сала кетейік, қатты дауылдан облыстағы бірнеше ауданда ғимараттардың шатыры қирады.
Ал ертең атыраулық оқушылар мен колдедж студенттері онлайн форматқа ауыстырылады.