АЛМАТЫ, 7 қыркүйек – Sputnik. Қарағанды облысындағы Қарқаралы мемлекеттік ұлттық табиғи паркіне 8, Қостанай облысындағы Науырзым мемлекеттік табиғи қорығына тағы 8 техника берілді, деп хабарлады Экология және табиғи ресурстар министрлігінің баспасөз қызметі.
Жаңа техника орман өрттерін сөндіруге тікелей қатысатын орман шаруашылығы мамандарының ұсынысын ескере отырып әзірленді. Оған 3 тоннаға дейін су сыяды, жоғары трафикке ие, өзін-өзі сөндіру жүйесімен және қозғалыс кезінде де сөндіру мүмкіндігімен жабдықталған.
Ведомство 2025 жылы лизингтік қаржыландыру есебінен отандық өндірістің өрт сөндіру техникасын жеткізу көзделгенін айтты: 354 өрт сөндіру машинасы, 349 орман патрульдік шағын кешені және 322 трактор.
Жыл басынан бері 136 орман патрульдік шағын кешені және 60 трактор жеткізілді. Қалған ерекше қорғалатын табиғи аумақтар биылғы жылдың соңына дейін кезең-кезеңімен техникамен қамтамасыз етіледі, дейді министрлік.