АСТАНА, 28 тамыз – Sputnik. Қызылорда қаласында 1500 орындық "Келешек мектебі" ашылды, деп хабарлады облыс әкімдігі.
Салтанатты шараға қатысқан облыс әкімі Нұрлыбек Нәлібаевтың айтуынша, аймақ бюджеті 2022 жылдан бері 226 пайызға өсті. Бұл қаражат өңірдің ең өзекті мәселелерін шешуге, тұрғындардың өмір сүру сапасын жақсартуға, ауқымды инфрақұрылымдық жобаларды іске асыруға бағытталып жатыр.
"Соңғы үш жылда білім саласына 812 млрд 245 млн теңге қарастырылды. "Келешек мектептері" ұлттық жобасы аясында 6 900 орындық 10 мектептің құрылысы жүргізіліп, пайдалануға беріліп жатыр. Бүгінде 3 300 орындық 7 мектеп ел игілігіне табысталды. Қалған 3 мектептің екеуін салтанатты түрде ашу үшін бас қостық", - деді Нәлібаев.
Белгілі болғандай, тағы бір мектеп Ұстаздар күнінде пайдалануға беріледі.
Әкімдік хабарлағандай, алдағы үш жылда өңірдегі 51 мектеп күрделі жөндеуден өтеді. Биыл облыстық бюджеттен тиісті қаражат бөлініп, 9 мектеп қайта жаңғыртылды.