АСТАНА, 27 тамыз – Sputnik. Цифрлық даму, инновациялар және аэроғарыш өнеркәсібі министрі Жаслан Мәдиев мемлекеттік қызметшілерді AITU мессенджеріне ауыстыру себебін түсіндірді, деп хабарлайды Sputnik Қазақстан тілшісі.
Министрдің айтуынша, мессенджерге иелік етіп отырған компаниялардың бірі – "Қазақтелеком" АҚ.
"Бірақ мәселе онда емес. Біз алдымен ұлттық мүддемізді ойлауымыз керек. Ақпараттық қауіпсіздік мәселесі де бар. Бүгінде бірнеше мессенджер бар. Мемлекеттік қызметшілер оны теріс пайдаланып жатады. Біз барлық мессенджерге тыйым салу керек деп айтып отырған жоқпыз. Қызметтік ақпарат деген бар. Ал оны пайдаланғанда ақпараттық қауіпсіздіктің жоғары талаптарын сақтау қажет. Сондықтан мемлекеттік қызметшілер құжатпен немесе қызметтік ақпаратпен алмасқанда ұлттық мессенджерлерді қолдануға тиіс. Біздің көздеп отырғанымыз осы", - деді Мәдиев журналистерге берген сұхбатында.
Осы орайда министр "басқа мессенджерлерді теріс пайдалану" проблемасына да тоқталды.
"Енді ол адами фактор ғой. Қазір бізде заңнамалық тұрғыда ақпараттық қауіпсіздікке қатысты барлық шектеу бар. Бірақ жұмыс орындарында заң бұзушылықтар бар", - деп атап түйіндеді Мәдиев.