АСТАНА, 24 тамыз - Sputnik. Рудныйда өткен қала күні мерекесіне орай екі заманауи дене шынықтыру-сауықтыру кешені мен жаңа субұрқақтар пайдалануға берілді.
Жобаның жалпы құны — 1 млрд 266 млн теңге.
"Sokol" кешенінің ауданы — 1 536 шаршы метр, ал "Sarybai" кешенінікі — 1 872 шаршы метр. Әр нысан бір мезетте 470 адамға дейін қабылдауға есептелген.
"Кешендерде волейбол, мини-футбол, баскетбол, гандбол және күрес секілді спорт түрлеріне арналған залдар қарастырылған. Жоба аясында 23 жаңа жұмыс орны ашылды. Жаңа нысандардың ашылуы арқылы жастардың белсенді демалысына қосымша жағдай жасалды", - дейді облыс әкімдігі.
Осы күні Рудныйда екі жаңа субұрқақ та іске қосылды. Оның бірі жаңа спорттық кешендердің жанында, екіншісі Гагарин мен Ленин көшелерінің қиылысында орналасқан.