АСТАНА, 29 шілде – Sputnik. Елорда вандализм әрекеттері мен қоғамдық тәртіпті бұзу жағдайларының алдын алу бойынша жүйелі жұмыс жалғасып жатыр, деп хабарлады Астана қаласының әкімдігі.
Астаналық полицейлер кезекті мүлікті бүлдіру оқиғаларын анықтады.
Мәселен, 26 шілде күні түнгі сағат 03:39 шамасында Бектұров көшесіндегі тұрғын үйлердің бірінің кіреберісінде 19 жастағы жас жігіт мас күйінде ақпараттық стендті жұдырықпен ұрып, әдейі сындырған. Ол осы әрекетке қатысты әкімшілік жауапкершілікке тартылды.
Тағы бір жағдайда 45 жастағы қала тұрғыны Toyota Avensis маркалы автокөлікті зақымдаған: капотын, есіктерін және қанатын сырып кеткен. Материалдық залал келтірілді. Құқық бұзушының тұлғасы анықталып, оған да тиісті әкімшілік шаралар қолданылды.
"2025 жылдың басынан бері осыған ұқсас құқық бұзушылықтар үшін 150 адам жауапқа тартылған. Оның ішінде 82 адам қамауға алынып, 68 адамға айыппұл салынған", - деп жазылған хабарламада.
Әкімдіктегілер бөгде мүлікті әдейі жою немесе бүлдіру үшін 60 АЕК-ке дейін айыппұл салу немесе 30 тәулікке дейін қамауға алу жазасы көзделгенін еске салды.