АСТАНА, 10 шілде – Sputnik. Астана қалалық полиция департаменті Перизат Қайраттың мәлімдемесінен кейін тергеу изоляторында түсірілген видеоны жариялады, деп хабарлайды Sputnik Қазақстан.
Астанада Перизат Қайраттың ісі бойынша алдын ала сот отырысы өткен болатын. Сол кезде ол тергеу изоляторы қызметкерлерінің өзіне дене жарақатын салғанын мәлімдеді. 9 шілде күні прокуратураға арыз да түсірді. Онда мекеме қызметкері камера есігін күштеп жапқан кезде оны есік арасына қысып, дене жарақатын келтіргенін жазды. Қазіргі кезде тергеу шаралары басталды.
"Тергеу аясында мекеменің бейнебақылау камераларындағы жазбалар зерделеніп, қызметкерлер мен куәлардан жауап алынды. Алғашқы тергеу әрекеттерінің нәтижесі бойынша П.Қайрат мәлімдегендей, камера есігін жабу кезінде мекеме қызметкерлерінің оған дене жарақатын келтіруі туралы сөздері расталмайды", - дейді полицейлер.
Олар арызда көрсетілген күні түсірілген бейнежазбаны тауып, желіде жариялады.