АСТАНА, 10 шілде – Sputnik. Алматы облысында баланы иттерден құтқарып қалған ауыл тұрғыны марапатталды, деп хабарлайды Sputnik Қазақстан Қарасай ауданы әкімдігінің ресми сайтына сілтеме жасап.
Бұл оқиға Алмалыбақ ауылындағы стадионда болды. Иттер ойнап жүрген балаларға тап берген. Сол кезде 10 жасар Максим Головачевті көлік жүргізушісі құтқарып қалған.
"Серікбек Сақайбаев өміріне төнген қауіпті елемей, итке қарсы тұрып, оны бейтараптандырып, баланы өлім аузынан арашалап қалды. Бұл – нағыз азаматтық батылдық пен шынайы ерліктің үлгісі.Серікбек Сақайбаевтың батылдығы елеусіз қалмады", - дейді әкімдік мамандары.
Бүгін оған алғыс хат пен демеушілер атынан қаржылай сыйлық табысталды. Сондай-ақ аудандық полиция мен төтенше жағдайлар бөлімі атынан алғыс хаттар мен естелік сыйлықтар тапсырылды.
"Бұл оқиға – әрбір азамат үшін үлкен сабақ. Қоғамдағы бейқамдық пен салғырттық адам өміріне қауіп төндіретіні анық. Заңсыз және бақылаусыз ит ұстау деректері анықталған жағдайда тұрғындар құқық қорғау органдарына немесе аудан әкімдігіне дереу хабарлауға тиіс", - делінген ресми хабарламада.