АСТАНА, 8 шілде – Sputnik. Қазақстанның Ресейдегі елшісі Дәурен Абаев "Коммерсантъ" басылымына берген сұхбатында елдер арасындағы екіжақты экономикалық қарым-қатынастың дамуы туралы айтты.
Ресей экономикамыздағы жетекші инвесторлардың бестігіне кіреді, деді Абаев. 2024 жылы ресейлік компаниялар 4 миллиард доллардан астам инвестиция салды. Ал Қазақстанның Ресейге салған инвестициясы шамамен 8,7 млрд долларды құрады.
2005-2024 жылдар аралығында 26 млрд доллар инвестиция салынды.
"Бүгінде Қазақстанда Ресейдің қатысуымен 28 мыңнан астам компания жұмыс істейді, оның 4 мыңға жуығы өткен жылы ашылды. Мұндай динамика өнеркәсіптік кооперациядағы оң үрдістердің арқасында мүмкін болды, оның аясында 48,2 миллиард долларды құрайтын 171 бірлескен жоба және 44 мың жаңа жұмыс орны ашылды", - деді елші.
"Құрғақ порт" ауқымды инфрақұрылымдық жобасына Қазақстан да қызығушылық танытып отыр, деді Абаев.
"Құрғақ порт" - Ресейдегі ең ірі көлік-логистикалық орталықтардың бірі. Оны Еуропа мен Азияның түйіскен жерінде жүзеге асыру Солтүстік ендік өткелін және Транссібір темір жолын Батыс Қытаймен және Каспий теңізімен қосуға мүмкіндік береді.
Сондай-ақ елші 7-10 шілде аралығында Ресейде өтіп жатқан халықаралық "Иннопром" шарасына Қазақстанның қатысуы туралы айтты.
"Соңғы екі жылда көрмеге 500-ден астам қазақстандық компания мен 2000 делегат қатысты. Иннопром-2024 қорытындысы бойынша құны 10 миллиард рубльден асатын 20 коммерциялық құжатқа қол қойылды", - деді Абаев.
2025 жылы қазақстандық делегацияны премьер-министрдің бірінші орынбасары Роман Скляр басқарып барды. Экспозицияда келесідей кәсіпорындар көрсетіледі:
Қарағанды құю және машина жасау зауыты;
Qarmet
Railways Systems KZ;
Bent;
"Қазақстан алюминийі".
Сондай-ақ Orda Glass ltd және т.б.
Жаңа бастамалар екі елдің экономикасының дамуын ынталандырып қана қоймай, халықаралық байланыстарды нығайтып, болашаққа жақсы серпін береді, деп түйіндеді Абаев.