АСТАНА, 20 мамыр – Sputnik. Қазақстан мен Сербия астаналары арасындағы тікелей әуе қатынасы 2025 жылдың соңына қарай ашылады, деп хабарлады көлік министрлігі.
Көлік вице-министрі Талғат Ластаев пен Сербия республикасының құрылыс, көлік және инфрақұрылым министрі Александра Софрониевич екі ел астаналары арасында әуе қатынасын ашу мәселесі бойынша келіссөздер өтті.
"Келіссөздерге Қазақстан тарапынан "SCAT" әуе компаниясының басшылығы мен туристік компаниялардың өкілдері қатысты. Кездесу барысында тараптар ағымдағы жылдың соңына дейін Астана мен Белград (Сербия Республикасы) арасында "әуе еркіндігі" бесінші дәрежесін пайдалану арқылы әуе қатынасын ашу мәселесін талқылады", - делінген хабарламада.
Бесінші "әуе еркіндігі" бұл - кез келген үшінші мемлекеттің аумағына жіберілетін жолаушылар мен жүктерді шетелдік аумақта қабылдау құқығы.
Бұған дейін Сербия Президенті Александр Вучич Мәскеуде Қасым-Жомарт Тоқаевпен келіссөздер қорытындысы бойынша әлеуметтік желілерде "жақында Белград пен Астана арасында тікелей әуе қатынасын ашу жоспарланып отыр" деп жазған болатын.