АСТАНА, 17 мамыр – Sputnik. Өскемен қаласында құтқарушылар терезесі ашық пәтерлерге "сөйлейтін" дрондарды жіберіп, қауіпсіздік шараларын түсіндіруге кірісті, деп хабарлайды Sputnik Қазақстан облыстық әкімдікке сілтеме жасап.
Осылайша, балалардың қауіпсіздігін қамтамасыз ету үшін заманауи технологиялар қолданылады. Құтқарушылар "сөйлейтін" дрондарды ұшырып, тұрғындарға қауіпсіздік шараларын түсіндіреді.
Сондай-ақ терезеге қауіпсіздік құрылғыларын қалай орнату қажеттігін көрсетеді. Осы жолы әлеуметтік жағдайы төмен отбасылардың терезесіне арнайы құрылғылар тегін орнатылды.
"Мұндай алдын алу шаралары қажет. Өйткені облыста балалардың терезеден құлауының екі жағдайы тіркелді. Ыстық күндері тұрғындар пәтерді желдету үшін терезелерін ашып, қарбалас тірлікпен жүріп балалардың қауіпсіздігін естен шығарып жатады. Оқыс жағдай деген қас қағым сәтте орын алуы мүмкін. Біздің міндетіміз – тұрғындарға ескертіп, осындай оқиғалардың алдын алу", — дейді облыстық депаратмент бастығының орынбасары Исхар Савазов.
Осы орайда олар жалғыз москит торы баланы ұстай алмайтынын қатаң ескертеді. Қауіпсіздік шаралары:
бала терезе алдына шыға алмайтындай жиһазды алыс қою;
терезелерге арнайы қорғаныс құрылғыларын орнату;
балаларды қараусыз қалдырмау және балконға жалғыз шығуына жол бермеу.