АСТАНА, 12 мамыр – Sputnik. Су ресурстары және ирригация министрі Нұржан Нұржігітов суару мақсатында қолданылатын судың ақысы өзгеретінін мәлімдеді , деп хабарлайды Sputnik Қазақстан тілшісі.
Шаруалар үшін жаңа тарифтік жүйені енгізудің негізгі мақсаты - суды үнемді пайдалануға ынталандыру. Министрдің айтуынша, қазіргі кезде суармалы судың тарифтерін белгілеудің жаңа әдістемесі әзірленіп жатыр.
"Жаңа тәсіл бойынша тарифтер ауыл шаруашылығы дақылдарының түрлеріне, тұтынылатын судың көлеміне, сондай-ақ су үнемдеу технологияларының қолданысына қарай сараланып белгіленеді. Бұл шара суды ұтымды пайдалану мен үнемдеуге ынталандыруды күшейтуге бағытталған", - деді Нұржігітов мәжілістегі үкімет сағатында.
Осы орайда министр суармалы суға тарифтік реттеу функциялары су министрлігіне берілгенін де еске салды. Бұған дейін бұл жұмыспен ұлттық экономика министрлігі айналысқан.