АСТАНА, 25 сәуір – Sputnik. Алматы қаласында жедел жәрдемге жол бермеген жүргізуші әйел жауапқа тартылды, деп хабарлайды Sputnik Қазақстан қалалық полиция депаратментіне сілтеме жасап.
Toyota көлігі арнайы шамдары қосылып тұрған жедел жәрдем көлігіне жол бермей қойған. Оны Трудовая және Әшімов көшелерінің қиылысында видеоға түсіріп алған. Осылайша, көлік жүргізушісі Әкімшілік құқық бұзушылық туралы Кодекстің 598-бабы, 1-бөлігі (арнайы жарық және дыбыс сигналдары iске қосылған жедел және арнайы қызметтер көлiк құралының жүруiне басымдық бермеу) бойынша заң бұзған.
"Жергілікті полиция қызметінің қызметкерлері әйелді әкімшілік жауапқа тартты. Оған қатысты алдын алу, түсіндіру жұмыстары жүргізілді", - дейді полицейлер.
Осы орайда тәртіп сақшылары жедел тапсырмаларды орындайтын көліктерге қатысты ережені сақтау тек заң талабы ғана емес, адам өмірінің мәселесі екенін де еске салды.