АСТАНА, 18 сәуір – Sputnik. Қасым-Жомарт Тоқаев Маңғыстауға сапары кезінде аймақтағы құқық қорғау органдарының қызметкерлерімен кездесті. Мемлекет басшысы олардың ел ішіндегі тұрақтылық пен тыныштықты сақтауға зор үлес қосып келе жатқанын айтты, деп хабарлады Ақорда.
Президент әскерилердің Әділетті Қазақстанды құру және "Заң мен тәртіп" қағидатын қоғамда терең орнықтыру үшін табанды еңбек етіп жүргенін айтты.
Мемлекет басшысы Маңғыстау облысы құқық қорғау органдарының қызметкерлерін марапаттады
"Бүгін мен аймақта қауіпсіздікті сақтау үшін мінсіз қызмет етіп жүрген бірқатар күштік құрылым өкілдерін мемлекеттік наградамен марапаттау туралы шешім қабылдадым. Жалпы, мен Мемлекет басшысы ретінде құқық қорғау органдарының қызметкерлерін әрдайым қолдаймын, еңбектеріңізді жоғары бағалаймын. Алдағы уақытта да мемлекеттің тірегі, халықтың қорғаны болып, адал қызмет етесіздер деп сенемін", – деді президент.
Мемлекет басшысының Жарлығымен қызметтік борышын атқаруда көрсеткен ерлігі мен жанқиярлығы үшін офицерлер мен сержанттарға II дәрежелі "Айбын" ордені, "Ерлігі үшін" және "Жауынгерлік ерлігі үшін" медальдары тапсырылды.