Қазақ тілін оқитын мәскеулік студенттер Қазақстанның Ресейдегі елшілігіне барды

АСТАНА, 3 сәуір-Sputnik. Мәскеу мемлекеттік лингвистикалық университетінің (ММЛУ) студенттері Қазақстанның Ресейдегі елшілігінде қонақта болды.

Бұл студенттер қазақ тілі мен мәдениеті орталығында қазақ тілін үйренеді. Орталық 2003 жылы Қазақстанның Ресейдегі елшілігі мен Әл-Фараби атындағы ҚазҰУ қолдауымен ашылды. Осы уақыт ішінде мұнда ондаған ресейлік студент қазақ тілін үйренді.

Елші Дәурен Абаев балаларға қазақ тілін таңдағаны үшін ризашылығын білдіріп, оқуда табыс тіледі. Ол студенттердің сұрақтарына да жауап берді.

Сонымен қатар студенттер Қазақстан-Ресей қатынастары мұражайының экспозициясымен танысты.

Дәурен Абаев наурыз айында Мәскеу мемлекеттік лингвистикалық университетіне барып, студенттермен кездескен болатын. Сол жерде елшіге орталық түлектері қазақ тілін кәсіби коммуникация ретінде меңгергені, яғни олар қазақ тілінде күрделі келіссөздер жүргізіп, күн тәртібіндегі мәселелерді талқылай алатындығы айтылған. Қазақ тілі Мәскеудегі жоғарғы оқу орнында үлкен көпмәдениетті тілдер отбасының толыққанды мүшесі болды.

Сондай-ақ елші Мәскеу студенттеріне дәріс оқыды. Оның бағамдауынша, қазақ тілі барлық түркі тілдерінің алтын ортасы болып табылады, оны білген адам түрік, қырғыз, әзербайжан және басқа да ұқсас тілдерді оңай меңгеріп алады.