АСТАНА, 31 наурыз — Sputnik. Атырау облысында полиэтилен өндіретін зауытының алғашқы қазығы қағылды, деп хабарлайды "ҚазМұнайГаз".
Жылына 1,25 млн тонна полиэтилен өндіретін және инвестиция көлемі 7 млрд доллар құрайтын зауыт құрылысын 2028 жылы аяқтап, өндірісті 2029 жылы іске қосу жоспарланып отыр.
Атырауда жылына 1,25 млн тонна полиэтилен өндіретін зауыттың құрылысы басталды
© Photo : ҚазМұнайГаз
"Зауыт негізгі өнеркәсіп салаларында қолданылатын 20-дан астам полиэтилен түрін шығаруға қауқарлы. Жоба құрылыс кезеңінің өзінде ұлттық экономикаға мультипликативті оң әсер тигізіп, Қазақстанның шикізаттық емес экспортын арттыруға ықпал етеді. Бұл өнімдер елдегі полиэтилен импортының 90%-ын алмастыра алады", - делінген хабарламада.
Зауыттың құрылысы кезеңінде шамамен 8000 жұмыс орны, ал өндіріс басталғаннан кейін 800 жұмыс орны ашылады.
️"Мұнай-газ химиясы саласындағы әлемдік жетекші технологиялық шешімдер жаңа өндірістің қауіпсіздігін қамтамасыз етіп, оның сенімді жұмысына және қоршаған ортаға минималды әсеріне кепіл береді", - дейді компания.
Зауыт Қазақстанның полиэтиленге деген ішкі сұранысын қамтамасыз ете отырып, өнімдерін ТМД елдеріне, Еуропа, Қытай және Түркияға жеткізуді жоспарлап отыр.