АСТАНА, 17 наурыз — Sputnik. Павлодарда "ХАС" деп аталатын қаржы пирамидасын құру бойынша резонансты іске қатысты сот үкімі шықты, деп хабарлайды өңір прокуратурасы.
2022-2023 жылдар аралығында қаржы пирамидасын ұйымдастырушы қылмыстық топ құрып, оны басқарғаны анықталды. Олар азаматтарды инвестиция құю арқылы табысы еселенетініне сендірген. Салынған қаржының үстінен 70%-ға дейін пайда көретініне сенген салымшылар соңында сан соғып қалған.
"Астана, Алматы, Павлодар, Екібастұз және басқа да елді мекендерден 376 азамат алаяқтарға 2 миллиард теңгеден астам қаражат тапсырған", - делінген хабарламада.
Сот қаржы пирамидасының негізін қалаушыны 12 жылға бас бостандығынан айырды. Қылмыстық топтың қалған мүшелері де түрлі мерзім мен жаза түрлеріне кесілді.
Қазіргі таңда үкім заңды күшіне енген жоқ.