АЛМАТЫ, 16 қаңтар – Sputnik. Түркістан облысы Мақтаарал ауданының мүгедек балаларды оңалту орталығының басшылығы бюджет қаражатын жымқырған, деп хабарлады қаржылық мониторинг агенттігі.
Орталықтың басшысы мен бас бухгалтері өзара келісіп, мүгедек балалардың ақшасын 6 жыл бойы жымқырған.
"2018 жылдан 2024 жылға дейін ай сайын 1С бухгалтерлік базасына жалған мәліметтер енгізіп, мүгедек балалардың қажеттіліктеріне арналған қаражатты өздерінің банк есепшоттарына аударып отырған. Жымқырылған қаражаттың жалпы сомасы 85 миллион теңгеден асты", - дейді ведомство.
Ұрланған қаражат мүгедек балаларға арналған оңалту бағдарламаларына бағытталуға тиіс болатын, алайда мұндай бағдарламалар қаржылық тапшылыққа ұшыраған.
"Сот орталық басшысын 8 жылға бас бостандығынан айыру жазасын, ал бухгалтерге — орташа қауіпсіздік мекемесінде 7 жыл бас бостандығынан айыру жазасын кесті. Сонымен қатар басшының 35 миллион теңге құны бар пәтеріне бұғау салынды", - дейді агенттік.