АСТАНА, 5 қаңтар – Sputnik. Ертіске құлап кеткен автокөлікте болған адамдарды іздеу әлі де жалғасып жатыр, деп хабарлады Төтенше жағдайлар министрлігі.
Қайғылы оқиға Семейде 5 қаңтарда сағат таңғы 6-да болды. Автокөлік бетон қоршауға соғылып, өзенге құлады. Көлік ішінде төрт адам болған. Жолаушылардың бірі көліктен өздігімен шығып, жағаға жүзіп жеткен. Ол медициналық көмекті қажет етпеген. Кейін жолаушылардың бірінің денесі табылды.
"Оқиға туралы хабар келіп түскеннен кейін оқиға орнына ТЖМ қызметкерлері барып, іздестіру-құтқару жұмыстарын бастады. Сағат 09:00-де іздеу тобы қайтыс болған бір адамның денесін тапты", - деп хабарлады құтқарушылар.
Қазіргі уақытта құтқару операциясына 55 құтқарушы, 5 жүзу құралы, 2 ұшқышсыз ұшу аппараты, су астындағы іздеуге арналған балық аулау құралы, 10 бірлік техника жұмылдырылды.
Операцияны күшейту үшін 68303 әскери бөлімінен ҚР ТЖМ әскери қызметшілері тартылды, сондай-ақ оқиға орнына Шығыс Қазақстан облысынан құтқару бөлімшелерінің қызметкерлері келеді.