АСТАНА, 5 желтоқсан – Sputnik. Еуразиялық экономикалық комиссияның жұмысшыларды әлеуметтік қорғау жөніндегі консультативтік комитетінің отырысында зейнетақымен қамтамасыз ету, Еуразиялық экономикалық одақ елдері қызметкерлерінің медициналық көмекке қолжетімділігі және медициналық тексеру нәтижелерін өзара тану мәселелері талқыланды, деп хабарлады комиссияның баспасөз қызметі.
ЕЭК экономика және қаржы саясаты министрі Бақыт Сұлтановтың төрағалығымен өткен шараға одақ елдерінен комитет мүшелері, шақырылған сарапшылар, сондай-ақ халықаралық ұйымдардың өкілдері қатысты.
Азаматтарға одақ шеңберінде зейнетақы құқықтарын қалыптастыруға және сақтауға мүмкіндік беретін жұмысшыларды зейнетақымен қамтамасыз ету туралы келісімнің орындалуы талқыланды. Жұмыс өтілін растау нысандарын пайдалану, сондай-ақ ЕАЭО интеграцияланған ақпараттық жүйесін пайдалана отырып, өзара іс-қимылдың электронды форматына көшу мәселелері қаралды.
"Қызметкерлерді зейнетақымен қамтамасыз ету саласында тараптар арасында трансшекаралық электронды өзара іс-қимылды орнату комиссия мен одақ мемлекеттері жұмысының басым бағыты болып табылады. Бұл жұмыстың аяқталуы құзырлы органдардың өзара іс-қимылын айтарлықтай жеңілдетеді және азаматтардың өтініштерін қарауға, сондай-ақ зейнетақы тағайындау және төлеу бойынша шешімдер қабылдауға кететін уақытты қысқартады", - деді Бақыт Сұлтанов.
Кездесуде сондай-ақ жұмысшылар мен олардың отбасыларының жұмысқа орналасқан елдегі медициналық қызметтерге қолжетімділігі мәселелері талқыланды. Атап айтқанда, ЕАЭО туралы шартқа сәйкес Ресей Федерациясындағы жұмысшылардың отбасы мүшелерін міндетті медициналық сақтандыруға баса назар аударылды.