АСТАНА, 16 қазан – Sputnik. Мәжіліс депутаты Наурыз Сайлаубай Ресейдің тәжірибесі негізінде жеке үй салуға 2 проценттік кредит беруді ұсынды, деп хабарлайды Sputnik Қазақстан тілшісі.
Болжамға сәйкес, 2050 жылға қарай Қазақстанда халық саны 27 млн-нан. асады. Оңтүстік өңірлерде адамдар көбейік береді, ал солтүстік және шығыс өңірлерде керісінше халық азаяды.
"Осы тұста көршілес Рессей еліндегі секілді, 2% пайыздық "Дальневосточная ипотека" бағдарламасы сынды жобаны жүзеге асыру аса маңызды. Мысалы бізде де елдің ең шалғайдағы нүктесіне барғаны үшін қосымша қолдаулармен бірге төменгі 2% пайыздық мөлшерлемемен үй алуға қарыз беру қажет", - деді Сайлаубай мәжілістің бүгінгі отырысында.
Сондай-ақ, депутат "9-20-25" бағдарламасының алғашқы жарнасын 20% пайыздан 10% пайызға азайту керек деп санайды. Ал пайыздық мөлшерлемені 8% пайызға төмендетсек, халыққа әлдеқайда тиімдірек болады.
"Мәселен, 2024 жылдың 2 тоқсанындағы есеп бойынша орташа айлық көлемі 403 251 теңге ал медианалық жалақы бағалау бойынша 278 296 теңге болып отыр. Енді санап көрсек, орташа жалақы алатын азаматтар ипотекалық несиеге айлығының 70 пайызын жұмсайды екен. Ал төмен жалақы алатын ияғни 278 296 теңге не одан да төмен айлыққа күн көріп отырған отандастарымыз бұл бағдарламаларға тіпті мүлден қатыса алмайды", - деп атап көрсетті Сайлаубай.