АСТАНА, 28 шілде – Sputnik. Қазақстанның қорғаныс министрлігі Голан жоталарындағы жағдайға қатысты мәлімдеме жасады, деп хабарлайды Sputnik Қазақстан.
Голан жоталарында Израильге қарасты Мадждаль-Шамс ауылына жасалған шабуыл кезінде 12 адам қаза тапты. АҚШ-тың бұқаралық ақпарат құралдары таратқан мәліметке сәйкес, Ливаннан ұшырылған зымыран футбол алаңына құлады. Сол кезде дабыл қағылған. Бірақ жасөспірімдер қашып үлгермеді. Қаза тапқандар 10-20 жас аралығында болған.
Қазақстанның қорғаныс министрлігі осы оқиғаға қатысты мәлімдеме таратты.
"Голан жоталарында БҰҰ бітімгерлік миссиясын орындап жатқан қазақстандық контингент қалыпты режимде жұмысты жалғастыруда. Жеке құрамның өмірі мен денсаулығына ешқандай қауіп жоқ", - дейді министрлік мамандары.
Израильдің ресми тұлғалары бұл жағдайға "Хезболланы" айыптап отыр. Алайда ұйым басшылығы бұл оқиғаға өздерінің қатысы жоқ екенін айтып, мәлімдеме таратты.
Айта кетері, қазақстандық жасақтың құрамында 139 әскери қызметші бар.