АСТАНА, 21 шілде – Sputnik. Маңғыстау облысында Жаңаөзен қаласынан Түрікменстан елінің шекарасына дейін апаратын жол жөнделеді, деп хабарлады Көлік министрлігі.
Жалпы ұзындығы 229 шақырымды құрайтын "Жаңаөзен-Кендірлі-Түрікменстан шекарасы" автожолын жөндеу мәселесі пысықталуда. Бұл Кендірлі курорттық кентінің және Маңғыстау облысының туристік әлеуетін одан әрі дамытуға ықпал етпек.
Құрылыс жұмысының жоспарын Маңғыстау өңіріне жұмыс сапарымен барған көлік министрі Марат Қарабаев бөлісті.
Қазіргі уақытта бұл жол IV техникалық санатқа жатады.
"Марат Қарабаев Жаңаөзен қаласынан Түрікменстан шекарасына дейінгі күре жолды көлікпен жүріп өтті", - деп жазылған хабарламада.
Мұнда жөндеу жұмыстары аясында жол конструкциясын нығайту және жол жабынын жаңарту көзделген.