АЛМАТЫ, 18 шілде – Sputnik. Абай облысында бүлдіршінді өлтіріп, денесін әжетханаға жасырған ер адамға үкім шықты, деп хабарлады облыстық қылмыстық істер жөніндегі мамандандырылған ауданаралық сотының баспасөз қызметі.
4 жасар баланы анасы күтушінің үйінде қалдырып, өзі ақша табуға кеткен. Трагедия болған күні күтушінің 38 жастағы күйеуі алкогольдік ішімдік ішіп, жас балалардың алдында киімсіз жүрген, артынан өзінің 9 жасар қызына қатысты сексуалдық сипаттағы азғындық әрекеттер жасаған.
"Бала күтушінің күйеуі 4 жасар баланы физикалық және моральдық тұрғыдан азаптаған. Бала үйде болған 4 айда ер адам оны жек көрген. Баланы өлтіру үшін бірнеше рет ұрған. Бала алған жарақатынан қайтыс болды", - дейді сот.
Ер адам жас баланың өлгенін күтіп, ешқандай көмек көрсетпеген. Осы әрекеттерінен кейін баланың денесін сөмкеге салып, жол бойындағы дәретхананың шұңқырына тастап кеткен.
Ал бала күтуші баланы күйеуінен қорғамаған және қауіпсіздігін қамтамасыз ету үшін ешқандай шара қолданбаған.
Прокурор ер адамға өмір бойына бас бостандығынан айыруды, ал оның бала күтуші әйеліне 2 жыл 6 ай бас бостандығынан айыру жазасын тағайындауды сұрады.
Ер адам азаптау бабымен кінәні толығымен мойындады, қалған айыптардан бас тартты. Әйел өз кінәсін толық мойындады.
"Сот айыпталушыны балаға қатысты азғындық, азаптау және кісі өлтіру әрекеттері үшін кінәлі деп танылып, өмір бойына бас бостандығынан айыруға үкім шығарды. Ал оның бала күтуші әйелі 2 жыл 6 айға сотталды, ол 3 жыл бойы кәмелетке толмағандармен жұмыс істеуге байланысты лауазымдарды атқара алмайды", - деп мәлімдеді Абай облысының қылмыстық істер жөніндегі мамандандырылған ауданаралық сотының баспасөз қызметі
Сот үкімі заңды күшіне енген жоқ.
Еске сала кетері, талайдың жағасын ұстатқан оқиға былтыр күзде болған. Анасы 4 жасар баласын бала күтушіге қалдырып, өзі ақша табу қамымен кеткен. Қайтып келгенде баласын таппай қалған.