АСТАНА, 6 шілде – Sputnik. Ресейдің Қазақстандағы елшісі Алексей Бородавкин архимандрит Сергийге Достық орденін табыс етті. Бұл туралы елшілік хабарлады.
Елші Ресей президенті Владимир Путиннің жарлығына сәйкес Орыс православие шіркеуінің Астана және Алматы епархиясы Астана шіркеу округінің дін қызметкері, архимандритке рухани байланыстарды дамытуға, достық пен ынтымақтастықты нығайтуға қосқан зор үлесі үшін жоғары награда тапсырды.
Ресейдің Қазақстандағы елшісі Алексей Бородавкин архимандрит Сергийге "Достық" орденін табыс етті
© Photo : Посольство России в Казахстане
Марапаттау рәсімінде елші архимандрит Сергийге Ресей мен Қазақстан арасындағы дінаралық және мәдениетаралық диалогты тереңдетуге қосқан көп жылғы еңбегі үшін алғысын білдірді, сондай-ақ оның Орыс православие шіркеуінің дәстүрін сақтауға қосқан елеулі үлесі мен күш-жігерін атап өтті.
Сергий әкей жоғары награда үшін алғысын білдірді. Православие шіркеуінің қызметі алдағы уақытта да халықты тәрбиелеуге, Ресей мен Қазақстан арасындағы достық пен өзара түсіністікті нығайтуға септігін тигізетініне сенім білдірді.