АСТАНА, 4 шілде – Sputnik. Ресей Шанхай ынтымақтастық ұйымы аясындағы өзара іс-қимылға үлкен мән береді. Ұйым теңдік пен бір-бірінің мүдделерін ескеру қағидаттарында біртіндеп дамып келеді, деп атап өтті Ресей президенті Владимир Путин.
Владимир Путин бұл туралы Астанадағы саммитте ШЫҰ-ға қатысушы мемлекеттер басшыларының отырысында мәлімдеді.
"Біз бұл өзара іс-қимыл теңдік, бір-бірінің мүдделерін ескеру, мәдени және өркениеттік әртүрлілікті құрметтеу және қауіпсіздік саласындағы өзекті мәселелердің алқалы шешімдерін іздеу қағидаттары негізінде біртіндеп дамып келе жатқанын атап өтеміз", - деді Владимир Путин Астанада өтіп жатқан ШЫҰ-ға мүше мемлекеттер басшылары кеңесінің отырысында.
Сондай-ақ ол қазақстандық әріптестердің осы кеңесте бекітуге құжаттар мен шешімдердің нақты пакетін дайындағанын айтты.
"Оларды іске асыру ШЫҰ-ның рөлі мен ықпалын нығайтуға ықпал ететіні сөзсіз. ШЫҰ елдерінің жаһандық және өңірлік күн тәртібінің негізгі аспектілеріне көзқарастары саммитте мақұлданған Астана декларациясында көрсетілген", - деп толықтырды Ресей президенті.
Сондай-ақ ол декларацияда ШЫҰ-ның барлық қатысушысының БҰҰ-ның орталық рөліне, халықаралық құқыққа, егемен мемлекеттердің өзара тиімді әріптестікке ұмтылуына негізделген әділ көпполярлы әлемдік тәртіпті қалыптастыруға деген адалдығы "көрсетілетінін" атап өтті.