АЛМАТЫ, 27 маусым – Sputnik. Қазақстанда кісі өлтіруге оқталды деген күдікке ілінген адам Кореядан экстрадицияланды, деп хабарлайды бас прокуратура.
Бас прокуратура мен ҚР ІІМ интерполының қызметкерлері Қазақстанның Кореядағы елшілігінің көмегімен күдіктіні экстрадициялады.
"Күдікті 2022 жылдың наурызында Түркістан облысының Сауран ауданында ауылдасымен жанжалдасқан. Төбелес кезінде күдікті қарсыласының кеуде тұсына бірнеше рет пышақ сұққан. Дер кезінде көрсетілген медициналық көмектің арқасында жәбірленуші аман қалды", - дейді ведомство.
Қылмыс жасағаннан кейін күдікті Корея Республикасының аумағында жасырынып жүрген.
"Биыл маусымда ол Кореяда ұсталды. Қазір Астана қаласындағы тергеу изоляторында отыр. Мұндай қылмысты жасағаны үшін сегіз жылдан он бес жылға дейінгі мерзімге бас бостандығынан айыру түріндегі жаза қарастырылған", - дейді бас прокуратура.
Айта кетері, күдіктіні экстрадициялау Қазақстан мен Корея Республикасы арасындағы 2003 жылғы 13 қарашадағы ұстап беру туралы шарттың арқасында жүзеге асты.