АСТАНА, 4 маусым – Sputnik. Қырғызстан премьер-министрі Ақылбек Жапаров Еуразиялық экономикалық одақ елдерін бірлестіктің ортақ энергетикалық нарығын құруды ұзаққа созбауға шақырды, деп хабарлайды РИА Новости.
"Энергетика туралы айтатын болсақ, одақтың ортақ энергетикалық нарығын құруды ұзаққа созбау маңызды. Энергетикалық ресурстарға қолжетімділік мәселелерімен қатар, біз қазір осы ресурстарды мемлекеттеріміздің аумақтары арқылы тасымалдауға арналған инфрақұрылымды дамытуға кірісуіміз керек. Бұл тауарлардың соңғы тұтынушылар мен мақсатты нарықтарға кедергісіз және үздіксіз қозғалысы үшін маңызды", - деді Жапаров Еуразиялық үкіметаралық кеңестің кеңейтілген құрамдағы отырысында.
Оның айтуынша, одақ аясында климат мәселелері де бүгінде өзекті болып отыр.
"Көміртек және утилизациялық алымдар жасырын, негізсіз кемсітушілік құралдарына айналуына жол бермеу керек. Сонымен бірге климаттың өзгеруімен байланысты төтенше жағдайлар және табиғат апаттарының алдын алу үшін органдардың жұмысын үйлестіру қажет. Бұл үйлестіру экологиялық және экономикалық зиянды барынша азайтуға мүмкіндік береді", - деді ол.
Жапаров сонымен қатар ауыл шаруашылығына суды үнемдейтін технологияларды және өнеркәсіп пен тұрғын үй-коммуналдық шаруашылықта энергия үнемдейтін шешімдерді енгізуге назар аудару керектігін айтты.