АСТАНА, 30 мамыр – Sputnik. Бейсенбі, 30 мамыр мен 6 маусым аралығында Алматыда Ұжымдық қауіпсіздік шарты ұйымы аясында бірқатар халықаралық іс-шара өтеді.
Жақын күндері Алматыда өтетін немесе қазір өтіп жатқан ҰҚШҰ аясындағы іс-шаралар тізімі:
30-31 мамыр – ҰҚШҰ-ға мүше мемлекеттердің қорғаныс министрлері кеңесінің отырысы;
2-3 маусым – ҰҚШҰ Парламенттік Ассамблеясы Кеңесінің отырысы;
5-6 маусым – ҰҚШҰ Қауіпсіздік кеңестері хатшылары комитетінің отырысы.
Осыған байланысты полиция департаменті алматылықтарға іс-шаралардың ауқымдылығын, сондай-ақ қатысушылар мен қонақтардың санын ескере отырып, қаладағы жол қозғалысы ішінара шектелетіні туралы ескертті.
Дегенмен жол шектеулері қоғамдық көліктерге әсер етпейді.
"Азаматтардан уақытша шараларға түсіністікпен қарауды және кептеліске тап болмас үшін жол бағдарын алдын ала реттеуді сұраймыз", - делінген қалалық полиция департаментінің хабарламасында.
Еске салайық, бұған дейін Қазақстанға Ресей мен Беларусь қорғаныс министрлері Андрей Белоусов пен Виктор Хренин келді. Олар ҰҚШҰ-ға мүше мемлекеттердің қорғаныс министрлері кеңесінің отырысына қатысты.